१० पुस २०७५ । यतिवेला विभिन्न विद्यालयहरुबाट विद्यार्थीहरुलाई शैक्षिक भ्रमणमा लैजाने क्रम फेसनकै रुपमा विकसित भईरहेको छ । स्कुलहरुले चाहे त्यो आर्थिक उपार्जनको ध्येयले आयोजना गरेको होस् या विद्यार्थीहरुलाई शिक्षा दिनको लागि पुर्वका विद्यार्थीलाई पश्चिम र पश्चिमका विद्यार्थीलाई देशको पुर्वी भागसम्म लैजाने गर्छन् । यस्तो शैक्षिक भ्रमणको सिलसिला पहिलेदेखि नै चल्दै आएको भएपनि पछिल्लो समय यो क्रम द्रुत गतिमा अगाडी बढिरहेको छ ।
शैक्षिक भ्रमण आफैमा विद्यार्थी तथा शिक्षकहरुको लागि शिक्षा प्रदान गर्ने प्रभावकारी उपाय हो । विद्यार्थीलाई घोकाएर भन्दा प्रत्यक्ष अनुभव गराएर दिईने शिक्षा कहिले पनि भुल्न सक्दैन । त्यसैले पनि शैक्षिक भ्रमणलाई विद्यालयहरुले आफ्नो सिकाईको माध्यमको रुपमा लिएका हुन्छन् तर विद्यार्थीहरुलाई देशका चर्चित भुभागहरुको मात्रै विचरण गराउनाले बालबालिकाहरु देशका सम्पदाहरुको विषयमा त परिचित होलान् तर आफ्नै जिल्ला र स्थानीय स्तरका सम्पदा तथा पर्यटकीय स्थलहरुको बारेमा अनभिज्ञ रहने गर्छ । त्यसैले विद्यालयहरुले शैक्षिक भ्रमणको लागि स्थान छनोट गर्दा सकेसम्म स्थानीय स्तरका सामाजिक, धार्मिक तथा साँस्कृतिक रुपले महत्वपुर्ण स्थानहरु प्हिलो रोजाईमा पार्नु अपरिहार्य देखिन्छ ।
धादिङ जिल्ला भित्र अनगिन्ती पर्यटकीय स्थलहरु अझै पनि प्रचार प्रसारको अभावमा लुकेर रहेका छन् । जुन राष्ट्रिय तथा अन्र्तराष्ट्रिय त परको कुरा जिल्लास्तरमा पनि परिचित गराउन सकिराखिएको छैन । देश संघीयतामा गईसकेपछि स्थानीय श्रोत र साधनको सदुपयोग मार्फत देशलाई समृद्धिको दिशामा अघि बढाउने लक्ष्य लिएको छ । सोही अनुरुप सरकारी तथा सामुदायिक विद्यालय तथा कलेजहरुले विद्यार्थीहरुलाई शैक्षिक भ्रमण गराउदा स्थानीय स्तरका ठाउँहरुलाई प्राथमिकतामा पार्न सके आर्थिक रुपमा समेत टेवा पुग्ने देखिन्छ । धादिङ जिल्ला भित्र धार्मिक तथा सांस्कृतिक महत्व बोकेको गंगा जमुना, त्रिपुरा सुन्दरी, ज्वालामुखी, सिद्धलेक, ज्यामरुङ दरबार, झार्लाङको तातोपानी, सेतो दह, नीलो दह लगायतका ठाउँहरुमा शैक्षिक भ्रमणको व्यवस्था गर्न सक्ने हो भने उल्लिखित ठाउँहरु पर्यटकीय हब बन्न सक्ने कुरामा कुनै द्धिविधा छैन । त्यति मात्रै नभएर स्थानीय ठाउँहरुमा विद्यार्थीलाई भ्रमणमा लैजादा आर्थिक रुपमा किफायती हुनुका साथै स्थानीय ठाउँहरुको समेत प्रचारप्रचारमा टेवा पुग्छ ।
